Property.com.mm | Buy, Sell, Rent - လယ်ယာမြေနှင့် အခြားမြေများ သိမ်းဆည်းခံရမှု ပြန်လည်စိစစ်ရေး ကော်မတီကို ရပ်/ကျေးအဆင့်အထိ ဖွဲ့စည်း

လယ်ယာမြေနှင့် အခြားမြေများ သိမ်းဆည်းခံရမှု ပြန်လည်စိစစ်ရေး ကော်မတီကို ရပ်/ကျေးအဆင့်အထိ ဖွဲ့စည်း

မကွေးတိုင်းဒေသကြီးအတွင်း မြို့နယ်များတွင် လွှတ်တော်ကိုယ်စားလှယ်များပါဝင်သော မြို့နယ်နှင့် ရပ်/ကျေး လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေး ကော်မတီများကို ယခုလလယ်တွင် စတင်ဖွဲ့စည်းနေပြီဖြစ်ကြောင်း သတင်းရရှိသည်။

မြို့နယ်အဆင့် လယ်ယာမြေနှင့် အခြားမြေများ သိမ်းဆည်းခံရမှုများ ပြန်လည်စိစစ်ရေးကော်မတီကို သက်ဆိုင်ရာ မြို့နယ်အုပ်ချုပ်ရေးမှူးက ဥက္ကဋ္ဌအဖြစ်ပါဝင်ပြီး တိုင်းဒေသကြီး လွှတ်တော်ကိုယ်စားလှယ်၊ စိုက်ပျိုးရေး၊ စည်ပင်စသော မြို့နယ်အဆင့်ဌာနဆိုင်ရာများ၊ တောင်သူလယ်သမားကိုယ်စားလှယ်သုံးဦးက အဖွဲ့ဝင်အဖြစ်နှင့် မြို့နယ်မြေစာရင်းဌာနဦးစီးအရာရှိက အတွင်းရေးမှူးအဖြစ် အဖွဲ့ဝင်စုစုပေါင်း ၁၂ ဦးနှင့် ဖွဲ့စည်းနေခြင်းဖြစ်ကြောင်း ယင်းကော်မတီအဖွဲ့ဝင် အောင်လံတိုင်းဒေသကြီး လွှတ်တော်ကိုယ်စားလှယ် ဦးအေးကျော်က ပြောကြားသည်။

‘‘လယ်ယာမြေကိစ္စတွေ အတွက် ကိုင်တွယ်လုပ်ဆောင်ရမယ့် ကော်မတီ ဖြစ်ပါတယ်။ လုပ်ဆောင်ရမယ့် လုပ်ငန်းဆိုင်ရာညွှန်ကြားချက် အတိအကျတော့ မသိရသေးပါဘူး။ အထွေထွေအုပ်ချုပ်ရေးဦးစီးဌာနရဲ့ ညွှန်ကြားချက်အရ ဖွဲ့စည်းခြင်းဖြစ်ပါတယ်။ အောင်လံမြို့နယ်မှာတော့ ရပ်ကွက်၊ ကျေးရွာအုပ်စုတွေ အဆင့်အထိ ရွေးချယ်စာရင်းပြုစုပြီး ဖြစ်ပါတယ်’’ ဟု ဦးအေးကျော်က ပြောကြားသည်။

ရပ်ကွက်၊ ကျေးရွာအဆင့် ကော်မတီကိုမူ သက်ဆိုင်ရာရပ်ကွက်ကျေးရွာအုပ်စု အုပ်ချုပ်ရေးမှူးက ဥက္ကဋ္ဌ၊ တိုင်းဒေသကြီးလွှတ်တော်ကိုယ်စားလှယ် အဖွဲ့ဝင်၊ ရပ်ကျေးစာရေး၊ မြေစာရင်းဌာနရပ်/ကျေးတာဝန်ခံနှင့် တောင်သူလယ်သမားကိုယ်စားလှယ်သုံးဦးနှင့် သ/မ အသင်းစသော ရပ်ကျေးဖွံ့ဖြိုးရေးအဖွဲ့အစည်းများမှ ကိုယ်စားလှယ်တစ်ဦးတို့ပါဝင် ဖွဲ့စည်းရမည်ဖြစ်ကြောင်း ဆင်ပေါင်ဝဲမြို့နယ် ပြည်သူ့လွှတ်တော် ကိုယ်စားလှယ်ဦးနေထက်ဝင်းက ဆိုသည်။

နောက်ဆုံးဖွဲ့စည်းပေးရမည့်ရက် အတိအကျကို မသိရှိရသော်လည်း ယခုလအတွင်း ရပ်ကျေးအဆင့်၊ မြို့နယ်အဆင့် ကော်မတီအဖွဲ့ဝင် စာရင်းများ ပြုစုပြီးစီးပါက သက်ဆိုင်ရာခရိုင်အုပ်ချုပ်ရေးမှူးထံသို့ တင်ပြရမည်ဖြစ်ပြီး ယင်းမှ တိုင်း၊ ဗဟိုအဆင့်ဆင့်သို့ ထပ်မံတင်ပြရမည်ဟု ဆိုသည်။

လယ်ယာမြေနှင့် အခြားမြေသိမ်းဆည်းခံရမှုများ ပြန်လည်စိစစ်ရေးကော်မတီကို ပြည်ထောင်စုအဆင့်တွင် ဒုတိယသမ္မတကဥက္ကဋ္ဌအဖြစ်လည်းကောင်း၊ တိုင်းဒေသကြီးအဆင့်တွင် တိုင်းဝန်ကြီးချုပ်က ဥက္ကဋ္ဌအဖြစ်လည်းကောင်း ဖွဲ့စည်းထားကြောင်း လွှတ်တော်ကိုယ်စားလှယ် ဦးအေးကျော်က ပြောသည်။

Source: 7Daydaily

လယ်ယာမြေနှင့် အခြားမြေများ သိမ်းဆည်းခံရမှု ပြန်လည်စိစစ်ရေး ကော်မတီကို ရပ်/ကျေးအဆင့်အထိ ဖွဲ့စည်း

Facebook comments