ကျောက်ဖြူ အထူးစီးပွားရေးဇုန်တွင် တွဲဖက်လုပ်ကိုင်မည့် မြန်မာကုမ္ပဏီများ ငွေကြေးခ၀ါချမှု ရှိ၊ မရှိ စစ်ဆေးနေဟုဆို

javascript

ကျောက်ဖြူ အထူးစီးပွားရေးဇုန်စီမံကိန်းတွင် တရုတ်ကုမ္ပဏီနှင့် တွဲဖက်လုပ်ကိုင်ရန် တင်ပြထားသည့် မြန်မာကုမ္ပဏီများအား ရွေးချယ်ရန် နောက်ဆုံးအဆင့်အဖြစ် အဆိုပါ ကုမ္ပဏီများကို ငွေကြေးခ၀ါချမှု ရှိ၊မရှိ ပြည်ထဲရေးဝန်ကြီးဌာန၌ စစ်ဆေးနေကြောင်း သတင်းရရှိသည်။

မြန်မာနိုင်ငံ အနောက်ပိုင်း ကျောက်ဖြူမြို့ အထူးစီးပွားရေးဇုန် အကောင်အထည်ဖော်ရန် ယခင်အစိုးရလက်ထက်တွင် တင်ဒါအောင်မြင်ထားသည့် တရုတ် CITIC ကုမ္ပဏီနှင့် တွဲဖက်လုပ်ကိုင်ရန် မြန်မာ့ကုမ္ပဏီ၂၃ခုက ၂၀၁၆ မတ်လ ၃၁ ရက်အထိ စိတ်ဝင်စားမှု ဖော်ပြလွှာ တင်ပြထားကြသည်။

အထက်ပါ ပြည်ထဲရေးဝန်ကြီးဌာန ခွင့်ပြုချက်ရပါက ယင်းကုမ္ပဏီများအနက် လုပ်ကိုင်ခွင့်ရကုမ္ပဏီများ ရွေးချယ်၍ သီတင်းပတ် နှစ်ပတ်မှ သုံးပတ်အတွင်း အကောင်အထည် ဖော်နိုင်မည်ဖြစ်ကြောင်း အဆိုပါစီးပွားရေးဇုန် စီမံခန့်ခွဲမှုကော်မတီ တာဝန်ရှိသူ တစ်ဦးကပြောကြားသည်။

‘‘အဓိကကပြည်ထဲရေးလက်အောက်က ငွေကြေးဌာနရယ်၊ DICA မှာရယ် စိစစ်နေတယ်။ ဒါတွေ ကင်းလွတ်ရင်တော့ ရွေးချယ်သွားတော့မယ်’’ဟု ၎င်းက ဆက်လက်ပြောကြားသည်။

DICA (ရင်းနှီးမြှုပ်နှံမှုနှင့် ကုမ္ပဏီများ ညွှန်ကြားမှုဦးစီးဌာန) တွင် ကုမ္ပဏီများ တင်ပြထားသည့် ငွေကြေးတောင့်တင်းမှု၊ ၀င်ငွေနှုန်းထား၊ အခွန်ဆောင်ထားမှုပမာဏနှင့်ယခင်လုပ်ကိုင်ခဲ့သည့် လုပ်ငန်းစီမံကိန်းများ စစ်ဆေးနေခြင်းဖြစ်သည်။ ယခုတင်ဒါအောင်မြင်ထားသည့် CITIC ကုမ္ပဏီသည် စက်မှုဇုန်နှင့် ရေနက်ဆိပ်ကမ်းကို အကောင်အထည်ဖော်ရန် လုပ်ကိုင်ခွင့်ရရှိထားသည်။ စက်မှုဇုန်အတွက် တင်ဒါခေါ်စဉ်ကာလကပင် ရှယ်ယာပိုင်ဆိုင်မှုကို မြန်မာဘက်က ၅၁ ရာခိုင်နှုန်းနှင့်တရုတ်ကုမ္ပဏီဘက်က ၄၉ ရာခိုင်နှုန်းသတ်မှတ်ထားသော်လည်း ရေနက်ဆိပ်ကမ်းအတွက် သတ်မှတ်ချက်မရှိသေးကြောင်း အဆိုပါကော်မတီတာဝန်ရှိသူကပြောသည်။

တင်ဒါအောင်မြင်ထားသည့် တရုတ်အစိုးရပိုင် CITIC  သည် ကုမ္ပဏီခြောက်ခုဖြင့် ဖွဲ့စည်းထားပြီး CITIC Consortium အဖြစ် ဖွဲ့စည်းထားသည်။ CITIC Con- sortium သည် စီမံကိန်းနှစ်ခုစလုံးအတွက် အမေရိကန်ဒေါ်လာ ကိုး ဘီလီယံရင်းနှီးမြှုပ်နှံထားပြီး မြေဧက ၄,၂၀၀ ကျော် အသုံးပြုမည်ဖြစ်ကြောင်း ထုတ်ပြန်ကြေညာထားသည်။

အထူးစီးပွားရေးဇုန် နည်း ပညာဥပဒေ၌ တင်ဒါအောင်မြင်ပြီး ကုမ္ပဏီနှင့် ခြောက်လအတွင်း သဘောတူညီချက် စာချုပ်ချုပ်ဆို နိုင်သည်ဟု ပြဋ္ဌာန်းထား၍ လာမည့် ခြောက်လအတွင်းစာချုပ်နှင့် ပတ်သက်၍ မြန်မာအစိုးရက ဆုံးဖြတ်ချက် ထပ်မံပေးပိုင်ခွင့် ရှိသည်။

အဆိုပါ စီမံကိန်းသည် ဦးသိန်းစိန်အစိုးရ လက်ထက်တွင် အလျင်အမြန် အကောင်အထည်ဖော်ခဲ့ခြင်းနှင့် အဆိုပါ စီမံကိန်းအတွက် တရုတ်ထံမှမြန်မာအစိုးရ ချေးယူရမည့် ချေးငွေသည်အတိုး နှုန်းများပြားသည့် ပြဿနာများ ကြောင့် ဒေသခံလူထုက စိုးရိမ်မှုရှိနေသော စီမံကိန်းဖြစ်သည်။

Source: 7daydaily

Facebook comments